السلام عليكم
الاول منورانا
ثانيا المفروض السؤال ده كان يتسأل من شهرين ولا حاجه
بس معلش كل الناس بتاخد صدمه اولى كليه بسرعه
والشاطر اللي يلحق نفسه ويلم المواد بسرعه
المهم هدخل في المفيد لاني عندي لجنه بعد ساعه ان شاء الله
هقولك الللي بقوله لاي حد في كليه نظريه واللي فعلا الموضوع ده اثبت معاه نتيجه كويسه
اول حاجه
هنمسك الكتاب نذاكره كله
مش هلحق لا هتلحقي باذن الله بس باصرار واننا هنخلص ومش هنقوم قبل ما نخلص وهنتعب
هنتدلع زي اول الترم يبقى مش هنعدي منه خالص
بس انا واثق اننا هنلتزم ونعدي منه ان شاء الله
هنمسك الكتاب ونمسك ورق خارجي
ونجيب الفصول ونتني صفحاتها
ونمسك الفصل على انه هو كل الكتاب منفكرش ان الكتاب كبير ولا حاجه
ناخد العناصر الرئيسيه فيه او العناوين ونكتبها بره
وناخد كل عنوان ونشوف الكلام اللي فيه ونعمل لكل قطعه عنوان فرعي ونكتبه تحت العنوان الرئيسي
طبعا العنوان الفرعي بتكتبيه من فهمك للقطعه الللي ملهاش عنوان
وبتاخدي العناوين دي كلها رئيسيه وفرعيه وتحفظيها زي اسمك وتكون هي اخر حاجه تتراجع قبل دخولك الامتحان
دلوقتي كونتي هيكل للماده في دماغك
نبدا نمسك الكتاب نقرأه مره ثانيه وبسرعه
ولو كان في وقت نقرأه ثالثه ورابعه وبسرعه مش تمسكي تحفظي حاجه
هتيجي الامتحان هتكتبي العنوان الرئيسي والفرعي هتفتكري كل الكلام اللي تحته او حتى نصه
مش مهم الدكتور اهم حاجه عنده العناوين خصوصا في الكليات الكبيره ومش زي ثانوي اهم حاجه الورقه منظمه والعناوين صح والكلام مقنع مش تأليف
وزي ما قولت بعيد تاني مش تمسكي حاجه من الكتاب وتحفظي اللي يتحفظ فقط العناوين لانك هتفتكري الكلام الداخلي لما تجاوبي
بس ده طبعا للناس اللي هتبدأ جد من دلوقت وتركز جدا ويبقى قدامها هدف مش تنشغل بالنت ولا بالموبيل ولا غيره
وعلى فكره الموضوع ده يخلي اي حد يجيب جيد جدا وامتياز لو نفذه صح مش لمقبول وخلاص
ودي كانت طريقتي في المذاكره طول اربع سنين الكليه والحمد لله كنت اول دفعتي كل سنه وانا كليه اداب يعني نظري بردو
اتمني تطبقي الطريقه دي وان شاء الله تتوفقي الترم ده وتجيلنا الترم الثاني من اوله واقولك ازاي تذاكري من اول الترم وتجيبي في كل المواد اعلى تقديرات ان شاء الله
بالتوفيق
تحياتي
