ملحوظة: القصتين دول كنت كتبتهم من فترة و كنت متردد في نشرهم عشان محدش يزعل مني و لكن فكرت و قررت نشرهم لأني شايف أنه أنسب وقت لنشرهم هو الوقت دة في ظل الظروف الاقتصادية السيئة اللى بنمر بيها و هى في ظني من غضب الله سبحانه و تعالى علينا، لعل و عسى أستطيع توصيل شىء لبعض العقلاء رغم أني متأكد أنه يستحيل تغيير عادات و تقاليد و عقلية مجتمع في يوم و ليلة.
القصة الأولى : فى أواخر رمضان قبل الماضي
من كام يوم كنت في سوبر ماركت
بشتري شوية حاجات للبيت و لى
شفت منظر غريب و بيتكرر كتير على فكرة
في مصر المحروسة بالذات و يمكن في بلاد العرب
واحدة ست بتجر قدامها تروللي مليان على آخره و معاها بنتها
تحسسك أنها شارية المحل كله
ياميش و زيت و سمن و رز و سكر و صابون و ...
من كل حاجة حسبة 10 اكياس و أزايز و علب
حتقولولي المنظر دة عادي ... لكن!
أنا مرة كنت بقرا في المصحف
لغاية ما وصلت للآية الكريمة اللى بتقول : "الشيطان يعدكم الفقر"
و توقفت قدامها متأملا متسائلا .. ازاى الشيطان يقدر يفقر البني آدم
هو يعني حيمد ايده في جيبه و يسرق فلوسه؟
طبعا لا . لكن الآية دي معناها أعمق من كدة بكتير
سيبكم من اللى بيضيع فلوسه على الخمرة والقمار و المخدرات و كافة أنواع المحرمات
اهى دي برضه طريقة من طرق الشيطان
طيب اللى ما لوش في السكك دى و مستقيم و في حاله
تفتكروا الشيطان حيسيبه؟
الاجابة هى لا بالتأكيد و حيحاول يجيله من سكة تانية
لما يوسوس للهانم مراته تعمل زى صاحبتنا دي
تشطب على فلوسه اول بأول
طبعا ما هو صنف الرجالة دول لما الفلوس بتجري في ايديهم بيفجروا
و يروحوا يتجوزوا تاني و تالت من وراكي و يا مآمنة للرجالة يا مآمنة للمية في الغربال
و يغلبك بالمال اغلبيه بالعيال و الى آخره من الأمثال النسائية الظريفة
اللى للأسف أصبحت منهج حياة للمرأة المصرية و تسببت في اضحاك العالم علينا
و طبعا الهانم جايبة بنتها معاها عشان تعلمها أول الدروس
ازاى تشطب على فلوس جوزها أول بأول فى المستقبل
و الشيطان شغال: بقى دة بس حيكفيكم؟
لازم تجيبي على الأقل من كل الأصناف حاجتين تلاتة
انتي عايزة مرات أخوكي تقول عليكي ايه
و للا الجيران و للا أختك و أمك عايزاهم يقولوا عليكم فقرانين؟
أنا كنت مستغرب ازاى الست قادرة تجر العربية التقيلة دي
بصيت لحاجتها و بصيت لحاجتي اللى متتعداش 10 حاجات
فأنا الحمد لله من صغري اتعودت آخد اللى يكفيني و بس
و العيد على الأبواب و كل سنة و انتو طيبين
و حنسمع عن الخناقات الزوجية بسبب كحك العيد و الغريبة و قرايبهم
و حنسمع كمان عن حوادث انتحار الزوجات بسبب عدم مقدرة الزوج على شرا الكحك
يا نهار أسود ! ازاى عايزنا نقضي العيد من غير كحك؟؟ انت عايز الناس تاكل وشنا؟؟
أنا و الله مش فاكر اني أكلت الكحك دة 4 أو 5 مرات في حياتي
افتكرت الرواية دى عن النبي: كان النبى صلى الله عليه و سلم يدخل على أهله فيقول : هل عندكم شىء؟ فان قالوا :لا قال اني صائم" ! يا حبيبي يا رسول الله ! تخيلوا النبي و أمهات المؤمنين اللى أحسن مني و منك و من الناس كلها كانت بتعدي عليهم أيام مش بيلاقوا حاجة ياكلوها!!
بالله عليكم قولولي الناس دى تعبوا و شافوا الويل عقبال ما وصلولنا الدين دة على طبق من فضة لكن احنا عملنا فيه ايه؟؟
بالله عليكم قولولي الآية دى نوديها فين ؟ : "و لتسئلن يومئذ عن النعيم " قالوا ما النعيم يا رسول الله ؟ قال التمر و الماء !
خرجت من السوبر ماركت بعد ساعة لأن الهانم كانت قدامي و طبعا عطلتني
و أنا الدنيا مسودة في عيني و بقول الواحد خايف ينتهي مصيره مع واحدة زى دي!
القصة الثانية: حدث في الميني باص
في يوم من الأيام كنت راكب الميني باص
قعدت فى الكرسي اللى قبل الأخير
على الكنبة اللى ورايا جم قعدوا بنتين
شكلهم كدة طالبتين فى كلية من الكليات
ابتدوا يتكلموا عن الكلية و الناس زمايلهم و بالذات الصبيان
ضحكت و قلت أسمع أهه الواحد يحاول يفهم البنات بتفكر ازاى
الكلام كله كان عبارة عن دراسة، تفتكروا دراسة عن ايه؟
عن الأحوال المادية و الاجتماعية عن زمايلهم الصبيان
فلان دة واضح انه مرتاح
و التاني أبوه عنده مجموعة محلات و مرة كنت هناك (البنت اللى بتقول)
و شفت ناس كتيرة داخلة و طالعة
معنى كدة ان فيه فلوس داخلة!
و التالت شفتي العربية اللى بييجي بيها الكلية؟ خطيرة مش ممكن!
تصوري دي بتاعته هو شخصيا أبوه جايبهاله
أمال تفتكري أبوه راكب ايه؟!
و الرابع فيه أمل منه أصل عنده شقة
و الخامس دة سيبك منه أصل معندوش شقة
و غيره و غيره و غيره....
يا رب يجيلهم يوم من الأيام يتعلموا فيه الأدب
و يعرفوا أن الناس و الدنيا مش فلوس و مادة و عقارات و عربيات
قعدت أدعي ربنا عشان محطتي تيجي بسرعة و أنزل
و أرتاح من النكد اللى عمال أسمعه ..
خير الكلام، يقول الطبيب الأعظم الذي لا ينطق عن الهوى: "تخيروا لنطفكم و لا تضعوها في غير الأكفاء" صدقت يا رسول الله!! يعني الحديث دة تحذير من الزواج بالنساء الغير أكفاء ، فقد تكون المرأة مصابة بالبله العقلي أو النفسي أو الديني ، فتنتقل الصفات دى للجنين و تبقى كارثة أجيال !!
و الموضوع مفتوح للمناقشة و شكرا
